Psa 139 | JAE | STEP | O Apômtau, aôm gôbi ŋoc ŋalêlôm lêtêŋ e kôjala aê.

Psalms 139

PESALEM 139

Anôtô kêjala gêŋ samob e gêdêŋ ŋamadiŋ to gêmoa gamêŋ samob

1 O Apômtau, aôm gôbi ŋoc ŋalêlôm lêtêŋ e kôjala aê.
2 Aê embe jaŋgôŋ me jandi sa, oc ôjala.
Aôm gômoa jaêc, mago kôjala biŋ, taŋ aê taêc gêjam naŋ.
3 Aôm gôlic aê kasêlêŋ me gaêc
ma kôjala aêŋoc lêŋ e tomalageŋ samob.
4 Ŋalô teŋ ênsac imbeloc atom tageŋ
ma aôm Apômtau oc ôjala kwanaŋgeŋ.
5 Aôm kôpiŋ aê auc aŋga muŋa ma nêm ŋa
ma gu lêmam gêsac môkêcapac.
6 Aê kasaê biŋ tonaŋ kaiŋ teŋ ŋanô
kêlêlêc aêŋoc kauc su, tec kajala atom.

7 Nêm Ŋalau gêmoa ma aê oc jasa ondoc
ma aê oc jaêc jamu ondocŋa gebe ôlic aê atom.
8 Aê embe japi undambê jawac, oc jatap aôm sa.
Ma embe jaja ŋoc mê ênêc lamboam, oc jatap aôm sa.
9 Aê embe jalôp jandêŋ gamêŋ oc kêpiŋa
ma najalêwaŋ jaŋgôŋ gamêŋ oc kêsêpŋa jana,
10 oc lêmam êwê aê aŋga ônê
ma ôsip aê sa ŋa nêm anôŋa.
11 Ma aê embe jasôm gebe gêsuŋbôm êkôm aê auc samucgeŋ
ma ŋawê, taŋ kêpô aê naŋ, ênam kesec,
12 mago aôm oc ôlic ŋakesec amboac ŋakesec atom.
Ôlic gêbêcauc amboac eleŋŋa ma ŋakesec amboac ŋawê.

13 Aôm taômgeŋ tec kôkêŋ aêŋoc ŋalêlôm
ma kôlêsôb aê aŋga tinoc têtaclêlôm.
14 Aê gajam daŋge aôm gebe kôkêŋ aê ŋamêtê kaiŋ teŋ.
Aêŋoc katuc kêjala gebe aômnêm gêŋ, taŋ gôgôm naŋ, kêtu gêŋsêga kaiŋ teŋ.
15 Aôm kôjala ŋoc ŋatêkwa ŋasec-ŋasec samob
gêdêŋ taŋ kôkêŋ aê kelec-kelec kôsiŋgeŋ ma kôlêsôb aê aŋga tinoc têtaclêlôm.
16 Matamanô gôlic aê gêdêŋ taŋ aê ŋanô kêsa atomgeŋ ma koto ŋoc bêc, taŋ taêm gêjam gebe jaŋgôŋŋa naŋ, gêc nêm buku kwanaŋgeŋ.
Gôgôm gêmuŋ kêsêp ŋasawa, naŋ ŋoc bêc teŋ mêŋkêsa atomanô naŋ.
17 O Anôtô, biŋ taŋ aôm taêm gêjam naŋ, ŋawapac, oc jajala amboac ondoc.
Gêŋ tonaŋ taêsam e ŋalêlêma atom.
18 Aê embe jasa sa, oc jalic êlêlêc gaŋac su.
Aê embe janêc e guluŋ jandi, naŋ jatap aôm sa.

19 O Anôtô, ônac alôb-alôbwaga êndumaŋ
ma ôkêŋ lau, taŋ sêwê kaiŋ dec naŋ, sêc su aŋga aêŋoc.
20 Lau tonaŋ tec sêkiaŋ tauŋ sa ma sêsôm biŋ alôb- alôb kêpi aôm
ma sêgôm aômnêm ŋaê kêtu meloc.
21 O Apômtau, aê oc jakêŋ kisa êndêŋ lau, taŋ sêkêŋ kisa gêdêŋ aôm naŋ, atom me.
Ma janam laŋôcanô ôkwi êndêŋ lau, taŋ sêli tauŋ sa gêdêŋ aôm naŋ, atom me.
22 Biŋŋanô, aê kakêŋ kisa gêdêŋ êsêac ŋajaŋa,
galic êsêac têtu ŋoc ŋacjo.

23 O Anôtô, ômbi aê lêtêŋ e ôjala ŋoc ŋalêlôm.
Ônsaê aê to ôjala gêŋ, taŋ taêc gêjam naŋ.
24 Ma embe ôlic aê jasa lêŋ dansaŋ jamoa,
naŋ ôwê aê jasa lêŋ ŋaŋêŋŋa.
^{▼▼Dawidnê pesalem teŋ.}